حكاية مكان
حكاية مكان
كتبت لمياء شكيب
في قلب زحمة رمسيس… فيه مبنى لو شفته من غير ما تعرف حكايته، ممكن تفتكره قصر.
بص على الواجهة اللي قدامك…
الأقواس الكبيرة،
والأعمدة الحجرية،
والشبابيك الخشب،
والزخارف اللي تقريبًا مغطية كل جزء من المبنى.
كل التفاصيل دي ممكن تخليك تتخيل
إن المكان كان قصر لأحد الباشوات.
لكن الحقيقة إن ده سبيل وكُتّاب أم محمد علي الصغير.
مبنى اتعمل في القرن التاسع عشر،
صدقة على روح الأمير محمد علي الصغير،
ابن محمد علي باشا.
وكان بيجمع بين وظيفتين…
في الأسفل سبيل لسقاية المارة،
وفوقه كُتّاب لتعليم الأطفال.
يعني المكان اللي ممكن تفتكره قصر
ماكانش معمول لسكن الباشوات…
كان معمول علشان الناس تشرب مية،
والأطفال تتعلم.
والأغرب إن المبنى بكل تفاصيله دي
موجود في مكان آلاف الناس بتعدّي منه…
في أول شارع الجمهورية،
جنب ميدان رمسيس.
ويمكن وسط زحمة العربيات وحركة الشارع،
ناس كتير بتعدّي من هنا
من غير ما تاخد بالها أصلًا
من حكاية المبنى اللي قدامها.
سبيل وكُتّاب أم محمد علي الصغير – رمسيس، القاهرة.
