نصيحة ستي 👵🏻
كتبت / هنا علي
نصيحة ستي 👵🏻
ياما قالت لي ستي
خلي بالك يا بنتي
دي الصحة ما تتعوضش
الصحة تاج على راسك
في إيدك زي فاسك
من غيرها الزرعة ما تكملش
خلى بالك صونيها
وقت الكبر تلاقيها
دا اللى يروح ما بيرجعش
قلت يعني ايه ستي
قالت اسمعي يا بنتي
الصحة دي زي القرش
حوشيها… تعوزيها
بسرعة رديت عليها
الصحة ما بتتحوش
قالت لأه اسمعيني
في شبابي كنتي تشوفيني
الكحلة ساحبة عيني
وجمالي ما يتقدرش
رجليه كانت شيلاني
ولا عمري قلت ياني
كات سكينتي سرقاني
وفوقت أهو وما لقيتش
غير عكازي ساندني
ونضارتي لحد ودني
ونهايتي جايه تدني
ورجلي بايظة ما بتشلش
خدى مني عبرة وآية
واقري تاني الحكاية
شوفي اللي حصل معايا
وياريت ما يتكررش
للأسف انا استهزيت
وكلامها كله رميت
وكأني ما سمعت ولا رأيت
وأخدت الدنيا قفش
دلوقت بقول يا ريتني
سمعت كلامك يا ستي
لو شلتها كنت لقيتها..
بس يا ريت…..ما بتنفعش.
